عهدي بها قدام تلبس عبايه... وانا بعد قبل البس شماغ وعقال!!
طفلين نتهجى حروف الهجايه
الله يامجمل سواليف الاطفال!!
كانت لنا في كل شارع حكايه..
وكنا نقول علوم ماهيب تنقال!!
وكنت اتقاسم مامعاها معايه... من (عسكريم) التوت ل(العلك)أبو ريال!!
وكانت بعكسي شاطره بالقرايه...
تقرا جزء عم وطه والأنفال!! وانا -لك الله-من مواري غبايه...
مدري ابو نقطه هو ذال أو دال!!
وكانت لابويه تشتكي من شقايه...
وتعلمه كيف اربط الباب بحبال!!
ياما على ظهري كسر من عصايه...
يقول لي: خلك وانا ابوك رجال!!
وامي تقول: ادع لولدنا بالهدايه...
خوفي يصيبه كثره الضرب بهبال!!
لاشفتها مع أول الدرب جايه... مادري انا اللي ملت والا الوطا مال!!
أحس قلبي يرتجف في حشايه...
ماكنه الا الضيف لاهز فنجال!! ياما عن (السعلو) تخبت ورايه...
لاخوفوها فيه ثم شافت ظلال!!
تقول خلك يا(صديقي)معايه...
واستانس العب عندها دور الابطال!!
واغااار حتى من عيون اصدقايه...
لا طالعوها!! قلت:
(تكفوووون يا عيال)!